UKUPHELA KWELIKAPHUNGASHE NOMAGEBA

UKUPHELA KWELIKAPHUNGASHE NOMAGEBA

Ngifikelwa kudabuka ngaphakath' enhlizweni yami,

uma ngibon' elikaMthaniya lifa phambi kwami,

Izinyoni zezulu zilibusa ngokungena mbuso,

Seligcwel' intukuthelo nenjabhiso alisenandumiso,

Sesibang' iqatha lemali' eliphonswa yib' ondlebe zikhany' ilanga,

Siza nkosi yam' ukhanyis' ezinhlizweni zethu ngelakh' ilanga,

Asisazi nalanga nanyanga sibona nje sekuphel' unyaka,

laf' elikaMthaniya, elikhulu nelihle kakhulu,
Kakhulu kakhul' okubuhlungu yikhon' okuhlungu,

Omama bathwel' usizi lwamabhungu

Alibel' ukudwanguz' ezonweni zokuncol' ebusuku,

Maye!! ngiqinisile luyofika lolosuku,

Laf' elikaMjokwana kaNdaba,

Sibamnyama sibulalana ngobumnyam' obumnyama,

Sibang' iqatha lenyam' engenyama,

Omuny' ujaha omunye,Omuny' emva komunye, izinhliziyo zibomv' igazi,

Siza nkosi yam' ubuyis' ezaseMpumalang' izazi,

Written By.: CYRIL SPHAMANDLA NTULI

SOB’ ULIBALEKE

Bengikuthanda ngithi ngizokushada,
Kuwena ngenz’ izethembiso zezulu nomhlaba,
Okungabonwanga abanye
Wena wakubon’ usengesam’ isithandwa,
Angish’ ukuthi buya
Kodwa ngifis’ ukwazi isizathu sokuphuma kwami enhlizweni yakho,
Mina bengikuthanda ngolweqinis’ uthando,
Konk’ okubi bengikugwema ngingalifun’ ihlazo,
Kalula nje kanjalo wena wayihlahlel’ inhliziyo yami ngembazo,
Waziqed’ izifiso zolweth’ uzalo,
Namhlanje yazi lokhu, ubungolwam’ ubambo,
Ngaphansi kwentshisekelo yothando
Sobabili besizoluhamba loluhambo,

Bengikholelwa kuwe, ngithi naw’ uyakholelwa kimi,
Kanti ngiyazikhohlisa ngiphuph’ isibil’ emini,
Ngiyohlezi ngikukhumbula ngamahlay’ ebengikuthekelela wona,
Ngob’ ukuhamba kwakho sobe ngakuqonda,
Ngizibuz’ ukuthi, kwaba yibhadi nom’ umhlola?
Nanamhlanje impendulo yakhona sobe ngayithola,

Uhleko lwakho belufihle lukhul’ enhlizweni yakho,
Ungisondez’ eduze nawe
kant’ usifuba singungubele ngaphakathi kwakho,

Isithombe sakho sihlezi sibuy’ emqondweni wami,
Noma ngithi ngiyazam’ ukukukhohlwa
Kodw’ ayivum’ imizwa yami,
Ubuyiqabung’ eliyinukisa kamnand’ inhliziyo yami,
Ngakuthanda ngokweqile
Wangenza ngakhohlwa isimilo sami,
Ngakwenz’ ithemba lawo wonk’ amathemb’ ami,
Wazazi zonk’ izifiso namaphuph’ ami,
Ngazam’ ukukubuyisa
Kodwa ngathol’ ukuthi usukhohlwe unomphela ngami,
Sengiyinhlekisa phambi kwabangani nabazwana nami,
Nanamhlanje ngiyafis’ ukwaz’ isono sami,

Sobe ngasikhohlw’ isenzo sakh’
Enhlizweni yami,
Hamba juba lami kodwa ze bengakucuthi phambili,
Phel’ olwakh’ uthando lusamile namanje kweyam’ inhliziyo,

NGALOLOSUKU

Uma konke sekudlulile,
Okomhlaba sekuphelile,
Zimbongi niyongihayel' inkondl' ehayekayo,
Eyopholis' amanxeba kwabathunukalayo,
Eyoduduz' abakhalayo,
Kuyobe kuwusuk' olukhulu ezitheni zami,
Kumuncu kwabazwana nami,
Kubuhlungu kwabazalwa nami,
Zimbongi zami, niyohay' inkondlo ngami,
Ekhuluma kabanzi ngezenzo zami,
Mama wami, uyokhuluma ngokujula ngempilo yami,

ONokulila bayosikhihl' esikaNandi,
Kuyobe kungemnandi kubuhlungu ngaphakathi,
Izinyembezi zabakhalayo ziyophenduk' umful' ogelezayo,
Hleze ngawo ziyohlanzek' izono nawo wonk' amacal' ami,
Lolosuku sobe alukhohlw' uMama wami,
Zimbongi zoqobo niyongiduduzel' abaseleyo,
Luyobe selufikil’ olokugcina,
Sekufikil’ okuyisela,

UTHAND' OLUNGENAMKHAWULO

UTHAND' OLUNGENAMKHAWULO

Izinyembezi zothando zihlobo zosizi,

umcabango wothando sihlobo senhliziyo,

Yebo!! Yebo!! ngiyakuthanda sihlobo,

Namhlanje ngiyavuma kim' usihlobo somphefumulo,

Iqiniso ngothand' angilazi kodwa kuwe ngizoyithol' impendulo,

Njengasendulo loluthando kuwe luza ngezinyaw' ezingenazicathulo,

Ngiyakuthembisa sobabili sohlezi sithandana njengesinqa nesitulo,

Woza kweyam' inhliziyo sicule lelihuboooooh,

uthando lwami ngawe mntanomuntu

Lunjengeselesel' elishelwe amanzi,

Kodwa kuwe ngiqinisile ngizowuthol' umthomb' okhethekile,

Enhlizweni yami, uwena kuphel' othandekile,

Ngelothand' igama kimi wen' uqambekile,

Sobe mina ngikuhlukumeze wen' uthembekile,

Hlala nami sphalaphala iphupho lami lobe lifezekile,

Usizi lwami kulomhlaba luyobe selusuliwe,

Ngomunwe wothando wen' usukhonjiwe,

Izinyembezi zothando zihlobo zosizi,

Umcabango wothando sihlobo senhlliziyo,

Qala phansi kweyakh' inhliziyo ungibhale phansi,

ngizokunik'uthando kuphela, kuwe angijahe Cansi,

ngithath' ungenz' owakho, ungithand' ungananazi,

Kunini ngidavuz' empilweni ngingenantokaz' engizoyib' umfazi?

Angikhulum' amanga ngizokwenz' umlobokazi,

Phela wen' uyintandokazi eyengamel' izintokazi,

Phakathi kwamakhosikazi ngizokukhetha ngikwenz' unkosikazi,

Yebo!!! ngiqinisile kweyam' inhliziyo uyiNdlovukazi,

NGIHAYELE MBONGI

Ngihayele mbongi,
Ngawakh’ amagama ngiqwashise ze ngingangeni kuleligodi,
Ngesakh’ isiZulu ngivikele kulengozi,

Izinkanuko zomhlaba zingilinde njengejozi,
Ngigqagqanise ekwenzeni okubi okungenamahloni,
Kulomhlaba ngiyavuma imin’ isoni,
Mbongi Mbongi ngihayele,
Ngihayele mbongi,